كتبت: آلاء محمود

اسم النص: ومين قال الراجل أقوى من المرأة وإن كان الراجل أضعف من المرأة مئة مرة.

للكاتبة: آلاء مَحمود

- 4سنين اتغير كل حاجة ولسه هي مراحتش من بالي ولا أحلامي يا سهيلة.

_ يا مازن هي خلاص اتخطبت وأنت كمان خطبت، شوف حياتك وكمل حياتك.

- أنا مش عارف أحب غيرها هي كانت كل حاجة ليا، أنا كل يوم بحلم بيها، أنا بحبها مش عارف أنساها.

_ أنت خلاص كلها شهر وتتجوز مينفعش كدا، لازم تنساها خلاص هي نسيتك خلاص ابعد وانسى

- أنسى ايه يا سهيلة؟ انتِ كنتِ بتشوفيني عامل إزاي، كان بيغمى عليا، اتعرضت لحوادث أكتر من مرة عشانها، عملت كل حاجة عشانها، واتقدمت كذا مرة ورفضوني، هما ليه رفضوني؟ ليه هي منفذتش وعدها وفضلت معايا؟ هي نسيت بالسرعة دي اشمعنا أنا منستش؟ أنا ليه بتعذب لحد دلوقتي؟

_ مكنتش أعرف إن في رجالة بتحب كدا، هو في حد لسه كدا؟ في حد بيفضل شاري بعد كل حاجة بتحصل؟ بس انت كويس يا مازن أنت تتحب وحِنَيِّن ومفيش فيك حاجة وحشة، بس أنت كنت صغير واستعجلت يمكن لو كنت صبرت شوية كان زمانكوا لبعض دلوقتي، ويمكن انتوا نصيبكوا مش لبعض.

- بس أنا بحبها، أنا مش عارف أنساها، هي ملكت كل حاجة.. جت خدت مني كل حاجة ومشيت، خدت مشاعري وحنيتي وحبي وكل حاجة، هي ضيعتني أنا كل يوم بحلم بيها يا سهيلة، عمري ما هنساها ولا هتروح من بالي لأنها مش كانت مجرد واحدة وخلاص هي بالنسبالي الحياة، أنا عايش على أمل إننا نكون لبعض في يوم من الأيام.