_هتفضلي تعيطي لحد امتى؟
=وانتي مالك؟
_طيب خلاص هسيبك براحتك.
=لاااااع استني
_عايزة ايه؟
=انتي هتسبيني وانا بعيط؟!
_خلاص اديني مرزوعة جنبك لحد ما تخلصي
=يا تقل دمك، المفروض إنك البيست
_أيوة أنا لبست صح لبست في حيطة، أعمل إيه بقا؟
=تهتمي بزعلي وتسأليني بعيط ليه وتطبطبي عليا
_حاضر
"قمت قعدت جنبها وحضنتها وطبطبت عليها"
_ها بقا بتعيطي ليه؟
=وانتي مالك!
_قومي من وشي، برة، داهية أما تخدك.
=على فكرة دي أوضتي!
_اوكييييه، سلامو عليكوو
=هتسبيني وأنا بعيط؟
_يا تقولي يا أمشي يا أقتلك وأخلص
=على فكرة بقا انتي لو لفيتي الدنيا كلها مش هتلاقي صاحبة زيي
_نفسي والله ادعيلي بس
=.....؟
_هتقولي ولا امشي
=اقولك بس متهزقنيش؟
_وراكي مصيبة إيه؟
=ألاه! يابنتي لازم تثقي فيا شوية
_إيه إيه يا عنيا؟ اثق فيكي انتي!! لأ طبعاً هخش النار
=بتتريقي! "وعيطت تاني"
_طب خلاص باااس باااس متعيطيش.
=ماشي بس استني
"وقامت تشوف نفسها في المراية عشان تعرف هي حلوة وهي بتعيط ولا لأ! أنا مصاحبة هبلة أنا اقتنعت خلاص"
_على فكرة لو طلعت حاجة تافهة أنا مش هسكت المرادي ومش هسامحك كدا بالساهل
=حقك عليا
_حصل خير
=أنا النهاردة وزنت نفسي
_وبعدين؟
=زدت أووووي "ورجعت تعيط تاني"
_طب بتعيطي ليه؟؟
=وانتي مالك
_يادي النيلة عليكي وعليا في ساعة واحدة
=خلاص والله
_انتي طولك كام؟
=١٥٥سم
_ووزنك؟
=١٥٠كم
_ياعيني، فاضلك ٥ كيلو وتبقي مربع.
=كرومباية بتتكلم؟!
_بت عيب
=طب قولي هنعمل إيه؟
_بصي احنا هنبدأ نمشي على دايت سوا ونشترك في جيم ونبقى قمامير تاني
=تمام حلو كدا
_بس نلتزم بقا
=اكيد طبعا اومال
_شطورة
=وهيكون عندي عزيمة
_برافو
=بصي أنا هبهرك
_اتمنى
=مش هيبقى ورايا غير دايت
_ورياضة
=ورياضة
_ودايت
=ها بقا هنتعشى شاورما سوري ولا بيتزا ايطالي؟
_....؟
=برجر طيب؟
_.....؟
=يابنتي
_......؟
=انتي بتعيطي ليه؟
_وانتي مالك!
*هدى_شرف*
ليست هناك تعليقات:
إرسال تعليق
دمتم بخير